2:28 PM Farg'onada tuyaqush boqish yo'lga qo'yildi | |
|
Farg'onada tuyaqush boqish yo'lga qo'yildi Rishton tumani Bog'iston qishlog'ida tashkil etilgan “STRAUS FARM” O'zbekiston- Buyuk Britaniya qo'shma korxonasida mahalliy sharoitda tuyaqush boqish yo'lga qo'yildi. Bu haqda O'zA xabar qilmoqda. Dastlab, 306 ming dollar evaziga xorijdan 200 bosh Afrika tuyaqushi keltirildi. 16 gektarga yaqin er ajratilib, tuyaqush boqish uchun kerakli maydon va o'tloqlar yaratildi. – Tuyaqush parvarishi boshqa qushlarni boqishdan o'ziga xos jihatlari bilan ajralib turadi, – deydi qo'shma korxona rahbari Farangiz Azimova. – Masalan, tuyaqush yaylovda o'zi o't qidirishni xush ko'radi. Shu bois, ularni keng dalada boqish maqsadga muvofiq. Tuyaqush go'shti dunyo oziq- ovqat bozorida mazali va xolesterini kam, parhezbop mahsulot sifatida qadrlanadi. Uning terisidan qimmatbaho kiyimlar, qo'lqop, poyabzal, hamyon va sumkalar tikilsa, tirnog'idan brilliant va olmosni tozalaydigan kukun, patidan esa par yostiqlar tayyorlanadi. Shuningdek, yumshoq mebellarni qoplashda qimmatbaho xomashyo sifatida foydalaniladi. 12-14 oylik tuyaqushning vazni 100-120 kilogrammgacha bo'lib, undan 20-25 kilogramm lahm go'sht, 1,2-1,8 metr kvadrat teri olinadi. Zamonaviy tibbiyotda uning pay tomirini inson a'zosiga transplantasiya qilishda keng qo'llanilmoqda. Mutaxassislarning ta'kidlashicha, tuyaqush 4 yilda reproduktiv yoshga etadi va parrandachilikda bunday qushlar “Brider” deb yuritiladi. Ularning o'rtacha tuxum qo'yish yoshi 10-15 yil, zotdor tuyaqushlar 40 yil davomida tuxum qo'yaveradi. Bitta tuyaqush 10-12 yil davomida qo'ygan tuxumdan chiqqan jo'ja go'shti o'rtacha 72 tonnaga etishi mumkin. Tuyaqush 70 yilgacha umr ko'rishi mutaxassislar tomonidan kuzatilgan. Katta yoshdagi tuyaqushning bo'yi 2,7 metr, vazni 150 kilogrammdan ortiq bo'ladi. Bir tuyaqush oilasi 1 mavsum – 10 oy davomida 80-100 tagacha jo'ja ochishi mumkin. Ta'kidlash joizki, 1 bosh tuyaqushdan 40-45 foizgacha go'sht olinadi. Bu yirik va mayda shoxli mollar, hatto boshqa parrandalar go'shtidan ham ko'pdir. Dunyo bozorida tuyaqush go'shtining o'rtacha narxi 12-15 evro, ishlov berilmagan xom terisi 60 evroni tashkil etadi. Sovuq va o'rtacha iqlimda etishtirilgan tuyaqush patining sifati issiq iqlimdagisiga nisbatan arzon baholanadi. Lekin bu ham boshqa sanoat darajasida etishtirilayotgan parranda patidan qimmatdir. Manba: "kun.uz" | |
|
|
|
| Всего комментариев: 0 | |